DILI, 31 agostu 2021 (TATOLI)—Projetu ho naran Malária, Tuberkuloze ka TBC, COVID-19 no HIV (MATCH), dezenvolve ona inisiativu foun ida no sei hadi’a diak liu tán diagnóstiku no vijilánsia ba moras infesiozu iha Timor-Leste (TL).
Projetu ne’e sei lidera hosi Menzies School of Health Research, hamutuk ho parseiru ne’ebé eziste ona ho Ministériu Saúde Timor-Leste, liu-liu Laboratóriu Nasionál Saúde (LNS) no Departamentu Kontrolu Moras.
Notísia relevante:Governu TL aprezenta progresu serbisu nutrisaun nian ba membru OMS
Projetu MATCH-TL ne’e sei serbisu besik liu ho Ministériu Saúde Timor-Leste, hodi hadi’a di’ak liu tan asesu no kualidade hosi teste diagnóstiku laboratóriu nian ba moras Malária, TBC, COVID-19 no HIV.
Líder ba Menzies Timor-Leste nia projetu-sira, Josh Francis haktuir katak, MATCH-TL sei ajuda rezolve sofrimentu a’as kona-bá morbilidade no mortalidade, hosi moras infesiozu endémiku-sira iha Timor-Leste.
“Resposta saúde públika ba Malária, TBC, COVID-19 no HIV ne’e enfrenta dezafiu barak, inklui asesu ba teste laboratóriu,” Francis, hateten liu hosi komunikadu, tersa ne’e.
Inisiativa foun ida-ne’e sei ajuda halo di’ak liu tan kontrolu ba moras no fortalese sistema saúde nian iha Timor-Leste.
Diretora Ezekutiva LNS-TL, Endang da Silva, hateten kolaborasaun hamutuk ho Menzies liu hosi MATCH- TL ne’e sei permite-sira atu kontinua fortalese sira nia kapasidade.
“Liuhosi suporta no kolaborasaun hosi ami nia parseiru saúde sira, LNS konsege rezolve dezafiu-sira ne’ebé mak ami enfrenta, no ami fiar katak Menzies nia investimentu sei reforsa liu tán kapasidade LNS nian, atu preparadu iha futuru, hodi fornese serbisu-sira ne’ebé TL presiza,” Endang da Silva, hateten.
Finansiamentu ba kolaborasaun ida-ne’e, hanesan parte ida hosi Austrália nia kompromisu millaun $242 ba Global Fund, hodi luta kontra AIDS, Tuberkuloze no Malária.
Foku hosi serbisu ida-ne’e dezenvolve ona iha parseria entre Austrália no Global Fund no sei masimiza impaktu relasionadu ho investimentu Global Fund nian.
“Doasaun ne’e projetadu hodi hasa’e impaktu hosi Global Fund nia serbisu iha ita-nia rejiaun liu-hosi fortalesimentu laboratóriu iha nasaun, hodi realiza serbisu esensiál, hosi halo teste no diagnóstika,” Embaixadora ba Seguransa Saúde Rejional, Austrália, Stephanie Williams, hateten.
“Sei kontinua mós atu reforsa parseria tékniku entre péritu-sira iha Austrália nia instituisaun sira nível mundiál no parseiru rejionál-sira,” nia subliña.
MATCH-TL finansiadu hosi Governu Austrália, Departamentu Negósiu Estranjeiru no Komérsiu.
Menzies School of Health Research, hanesan Institutu peskiza médiku koñesidu hosi Austrália ne’ebé dedikadu atu mellora saúde no moris-di’ak ba Aboriginal no Torres Strait Islanders sira-nian, no lider iha peskiza globál no tropikál nian kona-bá moras sira ne’ebé mak fó ameasa ba vida.
Menzies kontinua interpreta peskiza ba parseria no programa-sira ne’ebé efetivu iha komunidade iha Australiana no rejiaun Ázia Pasífiku.
Jornalista: Felicidade Ximenes
Editór: Cipriano Colo
